Kommunale tenester

IKA Hordaland ivaretek rettigheitsdokumentasjon frå alle kommunane som har høyrt til det historiske fylket Hordaland. Døme på slike kommunale tenester er:

  • barnevern
  • sosial/ NAV
  • helsestasjon
  • barnehage
  • grunnskule
  • PPT
  • personal
  • vakseopplæring
  • helse og omsorg/sosial

Karakterar og vitnemål

Karakterar frå grunnskulen er registrert på Vigo.no for personar fødd etter 1977 under “min utdanning”. Logg på med MinID for å sjå kva som er registrert om deg. 

Dersom du ikkje har tilgang til vitnemål frå din skulegang kan du ta kontakt med kommunen du gjekk på skule i for å få karakterutskrift eller utskrift av vitnemål. 

Fylkeskommunale tenester

Dokument frå din kontakt med fylkeskommunale tenester som tannhelse og vidaregåande skule ivaretakast hjå Vestland fylkeskommune. Ta kontakt med Fylkesarkivet i Vestland via deira nettstad.

Teieplikt

Alle offentlege arkiv er i utgangspunktet fritt tilgjengeleg for publikum etter offentleglova §3. Dette er eit viktig demokratisk prinsipp som er grunnlovsfesta saman med retten til ytringsfridom i §100. 

Det er likevel nokre unntak som set grenser for denne retten. Opplysingar som blir skapt om personar i offentlege tenester underleggast forvaltingslova §13 og andre lovverk. Denne paragrafen fortel at det er teieplikt om personopplysingar i 60 år. 

I tillegg er det sett klausuleringstid på 100 år for barneverns- og adopsjonsopplysingar jf. forvaltingsforskrifta §10. For helseopplysingar er det ikkje fastsett utløp for teieplikt jamfør Helsepersonellova. IKA Hordaland forheld seg etter rettingsliner sett av Arkivverket i slike tilfelle.